全城圍「工」 港股技窮？

台灣百萬民眾發起「天下圍攻」倒扁行動，對岸的香港市民遙相呼應，也來一個天下圍「工」．全城市民頓變「暴民」，一家老少「圍抽」工商銀行．以下幾點為我近日所察覺：

1. 除了旺角、觀塘裕民坊等傳統鬧市分行外，荒人見到就連新市鎮屋邨的銀行分行亦在店外擺放「攤檔」向市民派發工商銀行的申請表格及招股書．
2. 荒人一位同僚本身沒有涉足股票市場，感覺上他屬於凡事謹慎、戒心比較重的一類人士．即使早前中行、招行相繼路演 (Road show) 上市，傳媒舖天蓋地大肆宣傳，亦不能獲得我這位同僚歡心．但今次工行集資，這位同僚竟表現出一副饒有興趣的樣子，主動向荒人詢問有關上網手續費用 、eipo 等事宜．可見這位 (1398) 號的「北方佳麗」，已經成功攻陷及俘虜港人之芳心，就連我這位同僚也對「她」青眼有加．
3. 礙於工作期間不能上網，荒人平日唯有致電免費熱線查詢即時報價．當然因為免費關係，有時在交易時段內需要連續撥上四五次才能接通．但最近數天，我發覺要連續致電十次才能接通，甚至於在交易時段過後亦遇上線路繁忙的情況．這是否代表已入市的散戶或準備入市的散戶人數大幅飆升？

綜合以上三點所見，不知能否構成港股快將出現調整的一個危險訊號？

變形

噚晚咁蹺撞見啱啱放學嘅靚女Y，企係度傾咗陣偈．靚女Y 話：「你仲話走去跑渣打？ 點解你個身形唔同哂架？」
「唔咪呀？ 對上嗰次見你唔咪好耐之前咋喎！ 可能今日件衫比較貼身啲啫． (自我安慰！？)」
「係囉，個身脹咗，同埋隻手臂粗咗，個膊頭啲肌肉好似無哂喎，搞到個膊頭斜哂咁． (A字膊！！)」　
「 係啦，完全無咩動力去做運動，放工之後返到屋企都唔願落街啦．不過磅數應該無乜點重度，應該係啲肌肉鬆咗．」
「不過你咁樣落去真係唔掂噃，我都係啦，近排少做咗運動好多．」
「但係你好似冇咩點肥到喎．」
「係咩？ 哈哈！」 靚女Y 笑得花枝亂顫地問道．
「咁遲啲約埋一齊去跑步啦！」
「好．」

靚女Y 一番話真係聽到荒人心如鉛墜．唯一慶幸嘅係好彩塊面冇咩點肥到．如今之計，惟有著多啲 hip hop look 遮遮個身形先啦！ 當然最緊要儘快進行地獄式操練 (希望可以)．

不過，那種由低潮攀上高峰的感覺，我就是喜歡．